【Emily】被控暴動情侶 手寫信報平安
[2019.08.03] 發表
【明報專訊】今個周三提堂、被控暴動罪嘅44人之中，包括一對將會喺聽日結婚嘅情侶，有網民擔心佢哋又要結婚又要打官司，就想喺佢哋個婚禮度擺低啲人情，當係小小心意。噚日情侶喺連登上載咗一封手寫信，仲出示埋身分證上嘅姓名證明自己身分，同一眾網民報平安，多謝大家關心。
義務律師大狀幫手 無要求籌款
情侶就話，由被捕至噚日，除咗畀過1000蚊保釋金之外，一直有義務律師同大律師幫手，亦無要求佢哋準備費用，民陣嘅義務律師團隊仲應承會一直幫佢哋直至案件完結，叫大家唔使擔心，亦無要求過籌款。佢哋又特別多謝周三冒雨在場支持被捕者嘅朋友，話覺得好感動。
Emily幫大家「fact check」咗，有大律師確認封信的確係由被捕情侶所寫。Emily希望佢哋可以共患難、共富貴，無論順境逆境，都攜手面對。
更多港聞
相關新聞
