【Emily】美食博覽15日開鑼 5000套餐具供借用

美食博覽預備咗約5000個可重用餐盒同不鏽鋼叉、約2000個可重用杯畀市民借用，入場者到「借用站」擺低20蚊按金就可以使用。（李紹昌攝）

參展商之一「御茶園」推出「1蚊盡情啜啜啜」優惠，喺博覽首4日嘅頭4個顧客，可用膠管喺30秒內「啜」烏龍茶，每飲10毫升會獲贈1支茶。（李紹昌攝）

【明報專訊】一年一度嘅美食博覽喺今個月15號起，一連5日喺會展舉行。年年美食博覽都被批評製造太多即棄餐具垃圾，今年佢哋又會點應付？

貿發局副總裁周啟良話，今年預備咗約5000套可重用餐盒同不鏽鋼叉，比上年約1000套餐具多咗4倍，亦有約2000個可重用杯畀市民借用。入場人士只要去「借用站」擺低20蚊按金就即刻有得用。

另外，會場有兩個自助清洗餐具區域，亦會有至少20個參展商向自備餐具嘅市民提供優惠。負責提供呢批餐具嘅社企BottLess嘅創辦人魏華星話，以上年博覽入場人次有50萬嚟計，呢批餐具一定應付唔到所有人，不過希望可以鼓勵更多人自備餐具。佢話日後會繼續同貿發局合作，想喺大大小小嘅活動上都用番呢批餐具。

另外，近日社會有好多大型示威活動，周啟良話唔擔心對美食博覽有影響，因為上個月書展都好順利；不過博覽期間保安會加強，亦唔排除會請騷擾到活動舉行嘅人離場。