下月別醫局 梁栢賢：2022年見

醫管局行政總裁梁栢賢（中）話退休後會掛住記者會嘅大場面，一眾記者即舉起電話扮扑咪圍訪佢。

【明報專訊】擔任醫管局行政總裁9年嘅梁栢賢下個月底退休，噚晚任內最後一次出席周年傳媒晚宴。梁栢賢話退休後會最掛住記者會嘅大場面，一眾記者就舉起電話扮扑咪圍訪梁栢賢合照留念，趁機笑住問佢：會唔會選特首呀！估唔到梁栢賢都笑住答：2022年見！

澄清唔會選特首 先環遊世界

距離下屆特首選舉仲有3年，唔通咁快準備好參加選戰？梁栢賢澄清番話講吓笑，唔會參選，亦未諗退休後計劃，「可能大家都以為我有好路數，大家都唔信我冇嘢做」。佢話暫時唔會做嘢住，先環遊吓世界，9月去一轉日本東京，11月底去3個禮拜嘅歐洲遊，要同老婆去芬蘭探聖誕老人同睇極光。

梁栢賢話想做多啲義工，例如若政府諮詢委員會需要幫手，佢樂意加入，但唔想做番同「老本行」醫療相關嘅委員會。最後一個月返工，梁栢賢話努力緊寫下個財政年度嘅醫管局財政預算，希望退休前完成交畀政府，申請下年運作新撥款，同下任行政總裁高拔陞交接緊工作，仲會逐間醫院同同事講拜拜，就正式為醫管局嘅工作畫上句號。