【明報專訊】已故國學大師饒宗頤教授2002年將《心經》墨寶送咗畀香港，墨寶轉化成大型雕刻，豎立喺大嶼山鳳凰山嘅山坡上，成為「心經簡林」。旅遊事務署話，「心經簡林」最近完成改善工程，包括增設饒宗頤教授生平紀念牌、平面指示圖同休息座椅等，仲加埋二維條碼方便旅客瀏覽導覽資料，等巿民同旅客參觀時可以享受更豐富嘅旅遊體驗。

旅遊事務署感謝港大饒宗頤學術館同埋饒學研究基金喺改善工程期間嘅協助，並慷慨提供饒教授嘅「心經簡林」親筆題詞同《鳳過荷塘》畫作，並已將呢兩項作品刻劃於新增嘅饒教授生平紀念牌同平面指示圖上，畀訪客近距離欣賞大師作品。

署方又話，增設紀念牌係為咗介紹饒教授嘅生平同學術成就， 至於喺觀景台上安裝二維條碼，就可以方便訪客用手機連結至旅遊事務署嘅「心經簡林」網頁，了解景點嘅歷史同背景。

「心經簡林」喺2005年開幕，由38條8至10米高嘅花梨木樁組成，木樁依照山勢排列，最高嘅木樁並無任何雕刻，代表無限同無量嘅意思。