【明報專訊】為咗方便市民將手上嘅「神沙」轉換成鈔票或用作八達通增值，金管局自2014年開始推出兩部收銀車，輪流到18區收集硬幣；金管局噚日公布，兩部收銀車會喺6月10日至16日維修機件，服務暫停。
兩架收銀車齊齊喺今個星期暫停服務，咁啱撞正星期三各界發動嘅罷市罷工，要求政府撤回《逃犯條例》修訂，引來網民留言詢問金管局係咪響應罷工，亦有人表示支持收銀車「罷工」，有網民問「曲定直」。
金管局無回應網民疑問，不過公布呢個消息時，第一句已交代原因，就係「休息係為咗走更遠嘅路」，兩部車都要維修機件，相信大家都係諗多咗喇。根據公布，兩架收銀車會於下周一恢復服務，停泊時間同地點都已經上載到金管局網頁。
;)
