【明報專訊】各式各樣反對《逃犯條例》修訂嘅聯署近日湧現，新民黨主席葉劉淑儀噚日喺立法會保安事務委員會上話，留意到「全港師奶」嘅聯署，笑言「唔知係咪驚佢個先生喺內地包二奶畀人移交啦」，搞到好似全港好多人都好恐懼咁。原來佢咁講，係想問保安局長李家超究竟回歸至今，有幾多人被引渡到其他地方；不過，其實李家超一早已經講過「包二奶」喺香港唔係刑事罪，「通姦係我老婆找我麻煩啫」，即係唔係可以移交嘅範圍。 經民聯議員張華峰則喺會上批評，泛民拎修例「恐嚇港人、唱衰香港」，反着相關議員若覺得香港唔適合，「可以移民到其他國家去追求你嘅美國夢」。佢話有啲泛民對內地制度唔信任、唔認同，嚴重誤導市民，將條例引導成「惡法」，話通過後香港玩完、外資會撤走，係危言聳聽。 張華峰着泛民移民「追美國夢」 張華峰又舉例，話回歸前都好多外國雜誌大字標題話「香港已死」，但𠵱家恒生指數比起回歸前都升咗好多倍，又話「大摩」、「富時」都睇重內地市場，反問「難道佢哋對一國兩制、基本法喺香港實施無信心？」
|
| |
| |
;){kind=small}
;)
