再撞開會 建制克制 何俊賢收口避戰線 陸頌雄被大佬拉走

噚日民主派有明顯部署同分工，當石禮謙同建制派議員第一次離開會議室後，朱凱廸（左起）、梁耀忠、葉建源、譚文豪同陳志全等就擔櫈仔做「看更」，守住會議室2門口，以防建制派轉場開會。（鍾林枝攝）

建制派議員承認嘅主持石禮謙（右下戴眼鏡背向鏡頭者）喺大批保安員同民建聯鄭泳舜（右一）保護下進入會議室1。佢第一次入會議室想走近主席台時，民主黨許智峯（左一）想搶走支咪不果。（李紹昌攝）

【明報專訊】上周六立法會修訂《逃犯條例》法案委員會建制泛民混戰，各有人受傷，噚日雙方各自承認嘅委員會再次「撞會」，但議員表現克制好多。上次被指出手推新民主同盟范國威嘅民建聯何俊賢，噚日收口又收手，無做石禮謙「護法」，避開「戰線」；而說話惹火嘅工聯會陸頌雄噚日同區諾軒嘈咗兩句，即刻被大佬黃國健拉走，黃無佢咁好氣咁叫陸頌雄「唉行啦」。

民主派議員噚日都有明顯部署同分工，擺位清晰。先有譚文豪、許智峯通宵留守會議室外，其餘議員亦喺7點半前返到，再聚集喺會議室1同洗手間外位置開會。接近8點，保安員開鎖後，就由穿著便服嘅林卓廷同尹兆堅搶攻主席台，鄺俊宇、毛孟靜同葉建源亦有幫手霸位。

民主派擔櫈仔守門口 防建制轉場

至於衝擊建制派同抗議行動，就由郭家麒同區諾軒做主力，建制派由走廊行近會議室，佢哋就一路開咪嗌「非法會議」。石禮謙行入會議室後隨即被包圍，朱凱廸同區諾軒就沿用上次做法，企上枱抗議，其間許智峯企圖搶走石禮謙支咪不果。之後，建制派拉大隊離開會議室1，梁耀忠、陳志全、葉建源、譚文豪、黃碧雲就擔櫈仔當「看更」，守住會議室2門口，以防建制派轉場入去開會。

鄭泳舜張國鈞保安做石禮謙護法

建制派方面，上次負責做石禮謙「保安」嘅周浩鼎、陸頌雄、何俊賢同張華峰，噚日無份，交由鄭泳舜、張國鈞同幾個立法會保安負責。石禮謙進入會議室時並無跟建制派大隊，而係經消防通道行落2樓，全程有貼身保護。

更多港聞

公民黨幹事蔡素玉義工母親節爆衝突

【明報專訊】立法會議員上演激烈「爭位戰」，類似情况喺地區都有發生。今年有區議會選舉，唔少政黨地區樁腳都喺早兩日母親節擺街站，送鮮花或禮物畀街... 詳情

港Google Maps年底顯示優質旅遊商舖

【明報專訊】家陣有Google Maps傍身，世界通行，香港Google Maps最快喺年底可顯示「優質旅遊服務」計劃嘅商舖、食肆同埋住宿，... 詳情

Tanya出院：多謝醫護 多謝阿媽

【明報專訊】佔中9人案被告之一嘅公民黨議員陳淑莊（Tanya）今個月7號做完移除腦膜瘤手術，據悉化驗後證實係良性，佢嘅facebook專頁噚... 詳情

局長對腳呢？

【明報專訊】現屆政府好多政策局都有社交網站帳號，例如運房局facebook專頁「運房點線面」，就經常分享局長陳帆出席活動嘅情况。Emily最... 詳情

中文DSE擬撤口試卷 或併入校本評核 料7月諮詢

【明報專訊】負責檢討新高中核心科目、教育局轄下學校課程檢討專責小組，料7月發表諮詢文件。據了解，小組討論將中學文憑試（DSE）中文科佔14%... 詳情