上交所機械人 拒畀冧把議員

立法會議員同政制及內地事務局長聶德權（後排左一）等到訪上海證券交易所，一行人同上交所內嘅智慧型機械人員工「珍珍」（右下）互動，「珍珍」嘅回應鬼馬，𧨾得大家好開心。（政府新聞處）

【明報專訊】立法會長三角考察團嘅其中一個重點係考察創新科技，議員唔止參觀，仲同呢啲創科技術有唔少互動。考察團噚日去到上海證券交易所(上交所)，同上交所智能機械人員工「珍珍」言談甚歡，經民聯梁美芬一馬當先咁同珍珍介紹佢哋嚟自香港，珍珍就話未去過香港。美芬又問珍珍係咪會幫大家賺大錢，但珍珍話自己唔需要錢，因為上交所包食包住，𧨾到大家哄堂大笑。

金融界議員陳振英就問珍珍攞心水股票「冧把」，珍珍好有禮貌咁話唔好意思，因為投資涉及風險，佢唔可以回答。創新及科技局長楊偉雄都有隨團，但無特別去試試同珍珍互動。

林健鋒怕美芬「畀人睇晒」

去上交所前，考察團參觀張江科學城，美芬又搶住試玩「光場全息直播系統」，企喺8個鏡頭前做動作，佢嘅即時影像喺另一邊3D「重建」。美芬一企到鏡頭前面時，黨友林健鋒(Jeffrey)就笑言會唔會「乜都畀人睇晒」。到立法會主席梁君彥試玩時，Jeffrey則鬼馬地扮記者問「主席會否將某啲條例直上大會」。

更多港聞

議員訪上海新天地 羅康瑞夫婦請食飯

【明報專訊】立法會長三角考察團嘅大部分行程，記者都可以參與，不過前晚佢哋考察上海新天地呢個飲食消閒區，就不設傳媒採訪安排，究竟佢哋考察咗啲乜... 詳情

「美麗傳承」下周日戰國際賽

【明報專訊】嚟緊星期日（28日）沙田馬場將舉行「富衛保險冠軍賽馬日」，會有3項國際一級賽上演。其中冠軍一哩賽會由莎莎國際控股主席郭少明嘅細仔... 詳情