史上最熱年初四 毋阻內地客熱情
[2019.02.09] 發表
【明報專訊】迎來豬年，Emily竟然熱到要著短袖衫返工，原來噚日係本港最熱嘅年初四，亦係連續第3日破新春最高溫紀錄。天氣熱亦無阻遊客訪港，前日年初三(7日)內地客入境人次，成為近年農曆新年單日入境人次新高！
天文台噚日錄得氣溫25.1度，係繼大年初二、初三創下最高溫紀錄後，連續第3日打破紀錄！據天文台資料，香港過去最高溫嘅年初四係1978年嘅24.9度，噚日25.1度成為自1884年有紀錄以來最熱嘅年初四，流浮山氣溫更一度達28.5度！天文台長岑智明亦喺facebook話，「新正頭要開風扇我好似都係第一次」、「不過東風即將殺到，應該感覺會涼番少少」。天文台話一股達強風程度嘅東北季候風影響廣東沿岸，預計周末同下周初天氣稍涼，風勢較大，下周中氣溫逐漸回升。
新年咁熱，但無阻內地客訪港，據入境處資料，年初三內地訪客入境人次逾24萬，比年初二多萬幾人次，成為近年農曆新年單日入境人次新高。
更多港聞
相關新聞
