【明報專訊】全港市民換領身分證計劃舊年12月27日展開，1985年至1986年出生市民噚日起率先可以辦理換證手續，期限直至3月30日。大家可以到9間智能身分證換領中心辦手續，噚日唔少人話過程順利，10至20分鐘就完成，有啲人就好貪靚，影咗5至6次身分證相先至滿意。

立法會議員、官員等早前已可率先換證，議會陣線立法會議員毛孟靜(Miss Mo)就已拎咗新證，仲喺facebook上載證件一小角嘅相，佢話早前去換證時自稱「中國香港籍」，入境處職員就話「抱歉沒有這一項選擇」。Miss Mo嘅證上寫有「AZ」，佢好奇一問，原來A代表居留權，Z代表香港出生。

入境處為咗關愛老友記，市民可以帶最多兩個65歲或以上嘅親友去換證。助理入境處長(個人證件)陳天賜話截至1月19日已處理咗3.6萬宗申請換證個案。連同年滿11歲同18歲、因遺失或損壞而需要補領身分證、更改身分證資料等各類人，入境處舊年11月26日至本月19日就簽發咗66,648張新智能身分證。