【明報專訊】歌手張敬軒(軒仔)關注保育，試過保育錄音室，目前又住緊薄扶林百年大宅Old Alberose，最近有電視台嘅音樂特輯將大宅曝光，入面非常華麗，屬二級歷史建築。Emily聽爭取保育皇都戲院嘅團體「活現香港」講，原來Old Alberose係璇宮戲院(皇都戲院前身)創辦人歐德禮嘅舊居，活現香港最近邀請歐德禮嘅87歲新抱Molly同屋企人到港，仲安排佢哋同軒仔見面。 Emily聽當日有去嘅活現香港成員講，Molly喺1950年代都住過呢間大宅，當日軒仔不斷話「起晒雞皮」，同Molly講「Welcome Home」；重遊舊地嘅Molly亦記得屋內環境，話翻新後較以前光猛，又畀咗唔少舊相軒仔睇，令一直對大宅歷史好奇嘅軒仔相當興奮。 活現香港安排 盼保育皇都 活現香港話，欣賞軒仔好認真去了解大宅歷史，佢哋亦想今次同Molly做訪問，記錄更多同皇都有關嘅點滴。距離Molly一家離港仲有幾日，唔知佢哋稍後會唔會去一級歷史建築皇都戲院懷緬一番呢？
|
| |
| |
;){kind=small}
;)
