翠華為廁所汁認錯 網民倡出絞盡腦汁

翠華茶餐廳其中一間分店嘅餐牌，將蘑菇汁串錯咗做「廁所汁」（Washroom Sauce），翠華噚晚回應話「有錯要認」，仲決定請網民食飯。(網上圖片)

【明報專訊】唔少市民平日都會幫襯茶餐廳，噚日有眼利嘅網民發現其中一間翠華茶餐廳分店嘅餐牌驚現「廁所汁」(Washroom Sauce)！話說翠華噚日午市推出快餐「五香雞扒伴菌汁」，但懷疑有人串錯英文，將Mushroom Sauce(蘑菇汁)串咗做 Washroom Sauce，成為唔少網民嘅笑料，其中立法會議員田北辰仲極速喺facebook 出post 抽水，上載咗一幅佢喺洗手間成手梘液嘅相，並反問網民「Washroom Sauce？食得㗎？」佢仲喺Tag到提醒市民「叫餐時小心啲」。

話請提出新sauce網友食雞扒

翠華噚日亦好快回應，喺夜晚出post講明「錯係要認，飯就請定」，話老闆希望網民可以畀個機會同事，仲話既然網民咁有創意，不如諗吓下次出乜Sauce好，仲話會請頭50名喺翠華facebook留言、提出新sauce嘅網友食秘製菌汁雞扒咁話。唔少網民提出搞笑建議，例如「柚柑汁」(有金執)、「搞(絞)盡腦汁」等，亦有網民讚翠華今次反應快，「有錯肯認」。

更多港聞

無法引入天敵 對付野豬靠避孕

【明報專訊】繼鄉議局主席劉業強提出引入野豬天敵限制野豬增長後，噚日大埔區議會上，唔少議員亦提出相關建議。不過，野豬嘅天敵即係咩嘢呢？漁護署高... 詳情

九巴太陽能巴士站柱啟用 無光會着燈

【明報專訊】Emily通常好夜先收工，有時要搭啲唔係經常搭嘅巴士線，想望下巴士站柱上嘅巴士路線資料，都要開住手機燈先睇到。九巴噚日啟用咗首支... 詳情