唔想海洋生物誤食塑膠，就要用少啲塑膠產品，麥當勞繼今年9月起推行「無飲管星期一」之後，噚日再宣布下周一(24日)起，全線分店及McCafé每日都會推行「麥麥走飲管」；而需要攪拌嘅飲品，包括McCafé多款外賣凍咖啡，亦會以木攪拌棒取代塑膠攪拌棒，堂食會繼續使用不鏽鋼長柄匙。 措施推出後，全港麥當勞及McCafé會收起飲管箱內所有飲管，亦唔會主動隨飲品派發，但顧客有需要仍可向餐廳索取。不過，餐廳仍會為多款特飲、新地樂和奶昔等提供飲管形匙羹，如顧客唔需要，可向員工提出，「餐廳非常樂意配合」。 3招出 預期每年走塑逾30% 麥當勞話今年推出嘅3個措施，包括全面停用發泡膠容器、「麥麥走飲管」及停用塑膠攪拌棒，預期每年即棄塑膠使用量可減少逾30%。 另外，綠色和平5名成員噚日化身聖誕老人、馴鹿及聖誕樹等，走訪大快活、大家樂同美心MX港九各區22間分店，獻唱新編「Jingle Bells聖誕報膠音」，要求三大快餐店回應市民訴求，提供外賣自攜餐具3蚊嘅折扣，達到「慳膠又慳錢」嘅雙贏局面。
|
| |
| |
;)
