【明報專訊】本港經歷約一個星期低溫後，天文台預測本周氣溫會逐漸回升，去到聖誕節(下周二)最高氣溫更加會有23℃，意味或會成為27年來最高溫嘅聖誕節。而元朗大棠嘅紅葉亦都開始紅喇，Emily噚日去咗大棠睇過，有幾棵楓香樹嘅樹葉已經轉紅，但有幾棵先啱啱轉色，不過已經吸引到唔少人去影相打卡。 天文台預測，一股東北季候風正影響華南沿岸，今日天晴乾燥，市區最低氣溫約16℃，新界再低兩三度。星期六就係冬至，當日氣溫介乎20℃至23℃，睇嚟今年冬至都會暖笠笠喇。 天文台預測，下周一平安夜，短暫時間有陽光，氣溫18℃至21℃；聖誕節部分時間有陽光，最低氣溫19℃，最高達23℃。翻查資料，1991年嘅聖誕節，最高氣溫有成24.2℃，按照預測，今年有可能會係27年來最溫暖嘅聖誕節。而天文台有紀錄以嚟最高溫嘅聖誕節就係1932年嘅25.8℃。 雖然今年12月比較和暖，但漁護署上星期五已經更新咗大棠嘅紅葉指數到「B至C級」，B級即係「開始紅」。翻查資料，舊年聖誕前大棠嘅紅葉已開始進入A級「極紅」。
|
| |
| |
;){kind=small}
;)
