【明報專訊】區議會換屆選舉明年11月舉行，選舉事務處噚日向立法會提交文件，交代明年選民登記運動詳情，預算開支約2100萬元。 文件透露，為鼓勵年輕人登記做選民，選舉處未來除咗傳統宣傳渠道，亦會以社交媒體包括Instagram、facebook及YouTube等平台，向年輕人同公眾傳遞有關選民登記嘅信息。 選舉事務處話，現有選民更新登記資料嘅期限係明年6月2日，至於市民新登記做選民嘅期限就係7月2日。選民登記運動會分三階段，依次為提醒選民更新登記資料、呼籲市民登記做選民，最後係喺8月，提醒選民利用網上查閱系統或熱線核實登記資料。 區選每票資助額增至15元 另外，政務及內地事務局噚日提交文件，建議區議會選舉參選人嘅選舉開支上限，由原本嘅6.31萬元，按通脹提高至6.9萬元。區選當選者或取得最少5%選票嘅參選人都可以申領選舉資助，款額為選舉開支上限一半、參選人申報開支金額，或票數乘以每票資助額，三者中嘅最低者；文件建議，每票資助額由14元按通脹增至15元。
|
| |
| |
;)
