劉德華扮Batman湊女返學 墮馬有創傷後遺症
【明報專訊】劉德華昨日舉行《My Love Andy Lau劉德華World Tour Hong Kong 2018》演唱會記者會，邀請了逾百名粉絲、嘉賓及傳媒到場，華仔在這個35分鐘的活動儼如預演般，在台上又唱又跳兼做棟篤笑；除重提自己墮馬入院的秘事，有關妻女的問題也無所不談，全場氣氛高漲。
記者：鍾一虹
攝影：劉永銳
一身白馬王子造型的華仔心情勁靚，獻唱《17歲》出場，狀態甚佳。他稱個唱因墮馬事件延後一年舉行也是好事；過去一年休養期，他可參與個唱海報設計，「我可參與什麼呢？我識寫書法，中文寫得多，英文未試過，於是寫了My Love兩個字成為演唱會海報logo」。他又覺得個唱欠一首新歌，之前趁暑假遠赴布拉格製作一隻「大碟」，眾人見到盒內真是一隻瓷器碟，全場爆笑，他說：「個唱前我真的想出大碟，大家知我啦，有拖無欠！」
聲東擊西 開記招護囡囡
他重提25年前首次開個唱，然後問現場嘉賓是否記得其以往個唱的片段，台下大叫記得他的靚仔樣，華仔回應：「我知，很細個阿爸已話我知！大家記不記得空中飛人、小鳳仙裝，還有跳拉丁舞爆褲？這是不可修補的裂縫，邊個影的？影嗰個要誅九族，哈哈哈，所以大家叫我以後做褲要整闊些。」此時他說要報答傳媒支持，可以隨便發問。記者問他為何開學日不用湊女，反而開記者會？他風趣說：「我知道你們會問這些，我搞到你們來這裏，不要搞我個女！今朝我扮到Batman咁，無被人發現我入了學校。」再問屋企人是否睇足20場？他稱：「屋企人梗會來睇啦！」
當現場播出《獨自去偷歡》，華仔再施展舞藝，舞姿揮灑自如，他大嗌：「我條腰係得嘅！我還會跳中國舞，不過這天沒跳給大家睇。」
曬舞藝「我條腰係得嘅」
他又即場公布個唱嘉賓，一定是「我有別人無的」，然後拉開布幕，展示為個唱特製的一比一劉德華騷肌公仔，「不知點解，我得7嚿腹肌，鴛鴦的，哈哈，未來還見不見到7嚿腹肌？未必得，這是7年前的事，未必追到返來，我call它，它招呼都不打，就cut我線。」接着他唱了幾句《如果我有事》，他透露每次唱這首歌，工作人員嫌不吉利也阻止，但他知道很多人想聽，故爭取此曲加入個唱歌單。
住院趣事 護士長幫手洗頭抹身
提到去年墮馬受傷後，他坐包機返港後的小趣事，「落機後化妝師遞上4個口罩，說我很醜樣，擔心我被人影，提我要戴口罩。住醫院時，適逢農曆新年，將會很多人來拜年，於是年廿八，一班護士長衝入病房，提議我洗頭、抹身，senior幫我洗頭，junior幫我抹身，不過junior已60幾歲。」
古仔點唱《神鵰大俠》 即場找數
古天樂之前拍片支持華仔開個唱，更說自己跟華仔先後扮過楊過，故想點唱歌曲《神鵰大俠》。華仔說：「我怕在演唱會唱老歌，所以現在找數，看他屆時來不來踩場。」現場熒幕甫出一張華仔傷後撐拐杖照片，他打趣表示：「有個士的商說，希望以後跟我長期合作，我呸！我搵演唱會贊助商很嚴格的。」最後約定大家紅館見。
個唱以安全為先 無意除衫騷肌
受訪時，談到他個唱反應佳，會否考慮開part 2？華仔說：「剛才跳完舞都有少少喘氣，現在已開始練習。」他指自己的身體狀况，從醫學角度來講，神經線破壞了已不能恢復，腳趾尾有時會麻痹，令他心情有點煩，感覺似蛀牙，「我對什麼都有陰影，停車驚後面架車撞埋來，有嚴重創傷後遺症，但會樂觀面對」。過往個唱，華仔很多飛天遁地場面，今次則以安全為先，減少古靈精怪，他笑說：「今次只會瞓喺度，還專登請人用耳機指揮提我走位，希望預多少少時間踩場。實在太耐無做演唱會，想熟習一點。」嘉賓方面，華仔表示大家自投羅網，唱大戲也無妨。至於會否除衫騷肌？他稱：「今次不打算除衫，現在得一嚿(腹肌)咋，會盡量睇吓有幾多嚿可以返來。如果得三嚿半就著高腰褲，今年可不可以靠歌藝？」
拒效法黎明分享女兒照片
問到女兒會否來捧場？華仔說：「點知她睇不睇，要問一下她，不要理我啦，很難正面一一解答各位。」談到黎明將女兒照片上載社交平台分享 ，他稱：「我不會了，不習慣，自己都很少。」有提議他在個唱上分享全家福？華仔笑說：「大家不需用激將法， 我不受這套。」追問太太和女兒是否睇足20場？ 華仔賣關子：「到時你們自己搵吓。阿女有無點唱？她很少聽我的歌。」
■更多娛樂猛料：ol.mingpao.com
曾志偉想了解大灣區發展 會晤特首轉達演藝界訴求
【明報專訊】香港演藝界內地發展協進會（以下簡稱為內協會）今年3月正式成立，昨日內協會會長成龍、執行會長曾志偉、副會長汪明荃、秘書長王祖藍，以... 詳情
