上年度29條質詢 葛珮帆自稱Q后
[2018.08.29] 發表
【明報專訊】唔少議員都趁新一個立法年度未開始前總結年度工作，民建聯立法會議員葛珮帆(EQ)話，上個立法年度佢喺大會提出嘅口頭同書面質詢，夾埋有29條，自稱「Q后」，質詢嘅數量喺議員中最多。佢又話關心嘅議題多樣，由紀律部隊去到婦女、病人權益都有。
有議員會趁暑假去旅行休息，EQ話佢9月會跟財政司長陳茂波同香港工商界去以色列參觀當地科技，之後代表立法會直飛愛爾蘭，參加當地國會女議員舉行嘅國際會議，就女議員嘅角色、點推動婦女權益交流一下。之後佢會放番一星期假，同老公喺愛爾蘭自駕遊，EQ話以色列同愛爾蘭係佢第65、66個到訪嘅國家。以色列同加沙地帶交界局勢緊張，EQ話要數最驚險嘅一次行程，應該係阿塞拜疆，嗰次佢出入都有高大保鑣陪住，甚至要坐防彈車。
更多港聞
相關新聞
