團結基金訪3猛人 齊講大灣區
[2018.08.02] 發表
【明報專訊】粵港澳大灣區發展成為國策，人代、政協以至建制政黨，不時都講吓大灣區對香港有咩機遇，又為香港人爭取喺內地嘅便利措施。全國政協副主席董建華成立嘅團結香港基金，轄下facebook專頁「思考香港」，過去幾日就出咗幾名政界人物嘅訪問，好似政制及內地事務局長聶德權、商務及經濟發展局長邱騰華，以及行政會議召集人陳智思嘅專訪，3個猛人訪問都係圍繞一個題目﹕大灣區。
「思考香港」將3人訪問分開3日上載，其中聶德權就提到，明白市民要喺生活小節上感受到方便，先會支持大灣區規劃，所以佢哋都提出，要行走大灣區，點樣做到流動支付，「如果香港人無內地戶口，就算有內地手機號碼，我都開唔到，訂餐訂唔到，叫的士、叫出租(車)都叫唔到」。佢指未來會陸續推出更多便利港人嘅措施；又鼓勵年輕人多去其他地方睇吓，絕對唔係叫人一定要去內地發展，但如果一開始已經唔考慮，年輕人就會少一個發展機會。
邱騰華則由旅遊角度入手，指大灣區城市可以聯合做海外宣傳，「一程多站」有助吸長途客。
陳智思則強調，內地都唔想冲淡一國兩制，又話發展大灣區唔只係賺錢機會，亦可協助解決香港嘅老問題，包括養老等。
更多港聞
相關新聞
