話李梓敬「破唔到我紀錄」 曾叫蘇敬恆「傻仔」 卿姐回味
[2018.08.01] 發表
【明報專訊】民主黨前主席劉慧卿噚日喺網台節目《議會內外》訪問港台《城市論壇》主持人蘇敬恆(蘇B)，卿姐教蘇B主持論壇時要有威嚴，咁先可以鎮得住場面。卿姐仲講笑，話早排自由黨李梓敬鬧蘇B立場偏頗嘅片段，唔夠佢喺2015年出席論壇時稱呼蘇B做「傻仔」嘅片咁大迴響，當年有幾十萬點擊，話李梓敬「破唔到我個紀錄」。
蘇B做咗《城市論壇》主持大約3年，佢話近年大家無咁有興趣討論房屋問題，反而一講港獨，或者會有陳浩天同梁頌恆等人出席嘅論壇，氣氛就熱烈好多；同志平權嘅議題亦係好有火花嘅題目。
蘇B話維園阿伯少咗
蘇B話，節目𠵱家無咩太大秩序問題，話有啲「維園阿伯」喺謝志峰退休後，就無再現身喇。卿姐憶述之前出席論壇時，警方都會好大陣仗，一完場離開時會有「成班人追住我打」，所以成隊警察嚟送卿姐走。卿姐又提到「我最憎疊聲，真係㷫過火屎」，最不滿有時去論壇時，有其他人喺佢講嘢時疊聲發言，自己亦唔鍾意選舉論壇疊聲。
早前英籍女子QT申請受養人簽證隨同性伴侶來港案獲終極勝訴，《城市論壇》上個月探討QT案影響，嘉賓之一嘅反對同性婚姻大聯盟發言人李梓敬質疑蘇B立場偏頗，二人喺節目完結後仲「駁火」爭論。
更多港聞
香港石礦業170年歷史 建築填海材料 曾經靠晒佢
【明報專訊】香港大學研究團隊早前重塑本港石礦業歷史，發現本港石礦業原來有170年咁長歷史，20世紀初石礦業更加係發展蓬勃，全港有超過100個... 詳情
【明報專訊】特首林鄭月娥噚日與立法會「六散人」見面，聽吓呢班無政黨嘅建制派議員就施政報告嘅意見。保險界陳健波又有創意提議，要求增加高級公務員...
詳情
相關新聞
