【明報專訊】全國人大代表、政制及內地事務前局長譚志源(Raymond)去年7月離開官場，10月就加入前上司南豐集團主席梁錦松創辦嘅新風天域集團，做新風天域醫療副主席、新風天域教育主席，不過新工未做夠一年，Raymond又再跳槽，雖然Raymond 無公布自己去向，但政圈盛傳佢將會去做馬會公司事務執行總監，有報道就話佢將會8月中返新工，不過Emily向Raymond查詢，佢就話唔評論喇。

有了解馬會運作嘅政圈中人同Emily講，馬會可以話人才濟濟，幾個現任總監履歷都好勁，而Raymond將會負責內地事務同公共事務兩大部門，喺政府時掌管負責政制及內地事務局嘅Raymond可以話係非常適合，特別係馬會亦有唔少工作喺內地，好似從化馬匹訓練中心將於8月啟用，北京又有馬會會所，馬會過去亦一直協助四川災後重建計劃等。