《街頭祖霸王》熱爆短片升呢
NBA殿堂球星變老撐場
正當球迷為世界盃瘋狂，除了睇足球，睇基利艾榮、奧尼爾、韋伯、尼特羅賓遜及三分神射手米拿一班NBA球星化老妝，在新片《街頭祖霸王》(Uncle Drew)搞笑打籃球，一樣緊張刺激又賞心悅目。《街》片正是由YouTube總點擊率破億的短片系列升呢大銀幕之作，唔知佢有幾勁幾過癮，上網睇睇就知Uncle Drew有幾厲害。
撰文：張一明
百事六年前推出《Uncle Drew》第一集網上短片已經風靡全球，系列單計YouTube總點擊率至今已經破億，而各大社交平台總瀏覽量更超過十七億五千萬！《移動迷宮》(Maze Runner)系列監製馬提保雲(Marty Bowen)睇中《Uncle Drew》的人氣將之搬上大銀幕。
Uncle Drew由NBA勁旅塞爾特人巨星控衞基利艾榮(Kyrie Irving)化老妝扮演，他每次出場例必扮屎波，但熱完身就即刻爆seed，急停跳射、超遠三分、剷籃、偷波、入樽樣樣齊，令全場後生仔大跌眼鏡。
不過，電影版加入新元素，主線反而是《訪•嚇》(Get Out)人氣男星路威賀維(Lil Rel Howery)扮演的街波領隊丁屎，他為了組球隊，報名參加在街頭籃球聖地洛克公園舉行的大賽，可以去到好盡。
充滿喜劇細胞的艾榮亦會繼續親身上陣，還有多位NBA殿堂級人物齊組耆英隊落場，包括四屆NBA總冠軍「巨無霸」奧尼爾(Shaquille O'Neal)、三分神射手「牙擦蘇」米拿(Reggie Miller)、帝王傳奇前鋒韋伯(Chris Webber)、三屆入樽王尼特羅賓遜(Nate Robinson)、四屆奧運女籃金牌得主萊斯莉(Lisa Leslie)，齊齊施展球技，更與路威賀維大放笑彈。
導演查理史東三世(Charles Stone III)以往拍開MV，所以影片的色彩耀目，鏡頭剪接都富有節奏感。影片在美國正式上映前，已在多個地方的青年社區中心邀請大小朋友參加私人放映會，相當正面勵志。
