梁耀忠盼下屆為黃潤達「抬轎」 回應拒任主席 因為「好想講嘢」
[2018.06.26] 發表
【明報專訊】街工立法會議員梁耀忠(小圖)喺1995年開始擔任立法局(立法會前身)議員，雖然臨立會時期短暫「下車」，但佢喺1998年重返立法會至今，已經成為立法會內第二資深嘅議員。外界不時將阿忠同民協馮檢基比較，質疑阿忠係咪想「永續參選」，阿忠噚日接受民主黨主席劉慧卿訪問時透露，未決定2020年會唔會參加立法會選舉，但已經同黨友黃潤達有共識，最好嘅做法係「下屆我可以排第二」，幫黃潤達「抬轎」。
卿姐：街工已瓦解？ 梁：仍存在
阿忠近來接連有負面新聞，由缺席六四晚會、捲入黨內勞資糾紛、被批一人專政，導致20多人集體退黨；喺今個月初，阿忠以「唔喜歡」為由，拒任立法會一個擬議決議案小組委員會嘅主席，令主席變咗係工聯會何啟明，阿忠被批欠缺承擔。
阿忠喺卿姐嘅網台節目《議會內外》解釋上述不同事件，搞到卿姐不斷唉聲嘆氣。阿忠話，自己由1995年擔任立法局議員至今，除咗今屆出任人力事務委員會主席，其餘時間都未做過主席。佢解釋，唔想做主席係因為主席要畀委員發言，但「我真係好想講嘢」。阿忠對於最近拒做主席一事致歉，但都要加多句「可以唔做就盡量唔好做」，搞到卿姐大叫「唉，我都無你咁好氣」。
最近街工多人退黨，卿姐問﹕「街工係唔係已經瓦解？」阿忠話「仍然存在」，仲有3個執委及約70個成員，並指短時間內將召大會，重新組織執委會。
更多港聞
憶述播交響樂決定 前一哥李明逵要貝多芬唔要卡門
【明報專訊】警務處前處長李明逵最近接受馬會刊物《駿步人生》專訪 ，大談昔日警隊工作點滴。李明逵其中一件為人熟悉嘅事，就係喺1997年回歸典禮... 詳情
減廢變派膠 民記鄧麗玲捱批 話表達唔清楚 決重做7日減廢
【明報專訊】大嘥鬼早前推出「全城減廢大挑機」推動環保，大家連續7日分享如何減廢，亦可邀請朋友一齊挑戰，令政界人士不斷互相挑機，不過究竟大家係... 詳情
相關新聞
