【明報專訊】立法會財委會噚日通過撥款，為選舉事務處增設一個首席行政主任嘅職位，有民主派議員喺會上關注有人利用老人院舍「種票」問題。
議員關注院舍種票問題
上年選舉事務處發生電腦失竊事件，涉及300幾萬名選民嘅個人資料，而未來10年每年都有至少一次嘅選舉，政府話有必要增設一個首席行政主任常額職位，職銜係首席選舉主任，以保存機構嘅經驗、減輕總選舉事務主任工作量等。
公民黨郭家麒提到，某啲老人院突然增加咗多個選民登記，希望加咗個首席選舉主任位，政府可以承諾派人去老人院睇睇情?，係咪有老人家被利用「種票」。
政制及內地事務局常任秘書長鄧忍光話，選舉事務處喺選民登記之後有查訊程序，如果選民登記冊上有不尋常，好似一屋多姓，收到投訴都會跟進，但法律上就無派人去院舍查訊嘅機制。
議會陣線朱凱廸希望政府做多步，唔應該淨係發查核信，因為可能有院舍嘅職員幫唔識字嘅老人家回信確認選民登記，希望政府派人去親身問吓老人家有冇登記做選民。總選舉事務主任黃思文話，兩三年前已提醒過院舍，呢啲信要登記人親身確認，如果有人冒簽係犯咗刑事罪行。
;)
