【明報專訊】本港土地問題嚴峻，連先人都受波及。據食環署就財政預算案開支答覆，本港上年骨灰龕位累計輪候申請總數已逾2.9萬宗，平均輪候46個月。立法會議員謝偉俊就話，郵輪碼頭大樓長年冷清，猶如「東九停屍間」，倒不如將大樓「活化」，改建做大型骨灰龕場。 謝偉俊話，郵輪碼頭大樓商舖十室九空，質疑政府耗資82億公帑投資，都無經濟效益，提議商經局不如將碼頭大樓改建做大型龕場，「活化」碼頭。佢問局方「會否死馬當活馬醫」，出售龕位，按月收管理費，喺春秋二祭同藉「解穢酒」帶旺人流；仲提議邀請設計法國羅浮宮嘅建築師貝聿銘，喺碼頭末端起新饒宗頤紀念館，將碼頭活化做「慎終追遠」同「弘揚國學旅遊新景點」。 商經局常任秘書長(工商及旅遊)容偉雄答覆話，碼頭主要目的係畀郵輪停泊，無空間改建做骨灰龕；話建議無助增加人流同增添活力，而碼頭末端亦無空間設新景點。
|
| |
| |
;)
