【明報專訊】噚日一名自稱係專欄作家屈穎妍忠實讀者嘅精神病患者入稟區域法院，控告屈穎妍前年撰寫嘅一篇文章煽動讀者對精神病人嘅仇恨，違反《殘疾歧視條例》，要求屈穎妍賠償1蚊嘅懲罰性賠償。Emily打過畀屈穎妍，佢聽到係Emily打嚟就話「唔好意思唔得閒」收咗線。

Emily睇過份申索書，入面話屈穎妍前年4月2日喺「堅料網」上發表咗篇文章，內容包括「(精神病)病人本身的妄語怪行，他們自己都不能自控」，申索人覺得呢個寫作手法煽動一般讀者對精神病人仇恨、嚴重鄙視及強烈嘲諷，所以要告屈穎妍。申索人自稱「藍絲帶」，曾經企出嚟遊行支持屈穎妍，屈穎妍受「黃絲」攻擊時都有幫手反擊，但強調唔會因為自己嘅政治立場而包庇「自己人」咁話。