【明報專訊】唔少政治組織都喺維園擺年宵攤檔，去年被取消立法會議員資格嘅劉小麗都有開檔，為佢嘅「小麗民主教室」營運籌款，繼續做墟市、安老議題嘅工作。

唔係全部產品關政治事

小麗話啲產品唔係件件都同政治有關，但都希望喺輕鬆嘅同時，將理念放入設計，如印有「與其儲錢買樓 不如輕鬆遠走」嘅筆袋等。佢話，買嘅人睇得出個理念，亦有好多支持者特登過嚟同佢講加油，所以覺得好開心。

年三十年宵熟食墟兩邊走

噚日只係年廿九，但小麗話已經回本，佢哋都會參與深水埗通州街熟食墟，今日年三十佢預計要維園年宵同熟食墟兩邊走。噚日係情人節，小麗話慶祝方法「就係扭玫瑰花氣球畀其他情侶」。佢嘅產品中有印住「我要瞓到自然醒」嘅袋，小麗話係新年想做嘅事，因為呢排香港人要反DQ、要求鄭若驊下台，所以都唔夠瞓呀。