Ann姐惡鬥超雄 互指「異於常人」
[2018.02.02] 發表
【明報專訊】立法會噚日通過有關修訂《僱傭條例》及《職業介紹所規例》部分內容嘅草案，辯論時民建聯蔣麗芸(Ann姐)與工黨張超雄罵戰，互指對方「異於常人」。
辯論中介濫收佣金罰則
政府提出修訂法例，包括增加無牌經營職業介紹所及濫收求職者佣金嘅最高刑罰去到罰款35萬元同監禁3年，並將職業介紹所濫收佣金罪行嘅適用範圍，擴展至持牌人之外嘅人，包括管理層；政府亦提出修訂，將檢控無牌經營職業介紹所及濫收佣金罪行的時限，由現時6個月延長至罪行發生後12個月內。張超雄就提出將檢控時限進一步延長至24個月內。
民建聯蔣麗芸發言支持政府法案，反對張超雄嘅修訂，兩人分別發言4次，不斷反駁對方嘅理據。
其間張超雄形容蔣麗芸「比較有幽默感」、「異於常人」，話一般人有事都會盡快提出舉報，但好多唔同因素、環境令當事人未必可以及時舉報，特別係外籍家務工人，罪行往往發生喺初嚟香港之時，舉報中介公司或會影響份工等。蔣麗芸反駁，「你唔講我都諗唔起，究竟邊個係異於常人呢」，話香港好多市民好關心假難民問題，指張超雄為假難民發聲，佢話唔少市民都問，「點解張超雄諗嘢咁異於常人呢？」佢話如果外傭姐姐一嚟就被扣工資，就算去到第12個月仍被扣，按政府嘅修訂，佢到臨完約都可以告發僱主。
草案經一輪辯論後，最終政府修正案喺建制派支持、泛民投棄權票下通過，由於政府修訂通過，張超雄唔可以動議佢嘅修訂。
更多港聞
曾任鋼琴調音師 港唯一女釘甲匠：釘馬蹄挑戰更大
【明報專訊】全港約有40名釘甲匠，區家雯（Carman）係現時唯一女將，曾經做過鋼琴調音師，佢話調琴需要了解鋼琴運作，釘甲就要清楚馬嘅性格，... 詳情
幼園缺課一周擬須通報 有校長指限期太短 倡校方自行判斷
【明報專訊】上月初5歲女童陳瑞臨（臨臨）疑長期遭虐打事件，引起社會關注虐兒問題。教育局長楊潤雄表示，考慮將幼稚園現時30日缺課的通報限期縮短... 詳情
相關新聞
