【明報專訊】外國投資對香港嚟講好重要，近年創業氣氛熾熱，投資推廣署喺2016年起舉辦StartmeupHK創業節，將香港定位為一個全球主要嘅創業樞紐，希望吸引多啲人嚟創業。而第三屆創業節將於1月29日起一連五日喺灣仔會展舉行，今年五大主題包括金融科技、互聯城市、零售科技、健康科技同生活聯網，將邀請過百名專家、政府代表、企業家等參與論壇，討論各個範疇嘅發展，仲會教人「如何成為市值超過10億美元嘅『獨角獸』企業」；同場亦會舉行創業比賽，預計有超過5000名本地及海外企業家、投資者參與。
今年創業節合作機構之一畢馬威會計師事務所會舉辦以「智慧城市」為題嘅論壇，陣容仲好國際化，新加坡、維也納、鹿特丹都有專家嚟分享當地智慧城市發展。畢馬威代表同Emily賣關子，話論壇當日會公布一項調查報告，講香港市民同商界人士對智慧城市嘅睇法，叫Emily一定要去了解一下。
;)
