【明報專訊】運輸署有3個關於交通資訊嘅應用程式(App)，其中「乘車易」10月底推出咗新功能「易行」，加入銅鑼灣一帶1.5平方公里嘅步行路線，可以用地圖或文字教人行去目的地，仲可以睇到預計步行時間。運輸署總工程師(交通及運輸調查部)羅慶新話，新功能同坊間地圖App最大分別，係可以顯示埋沿途行人設施，例如交通燈、斑馬線、行人天橋、𨋢位、樓梯等。

增銅鑼灣1.5公里步行路線

Emily噚日試用咗新功能，地圖會區分埋行人路同車路，唔會淨係籠統咁話畀你知要行邊條路，不過定位有啲唔準，明明身處駱克道，但地圖定位喺軒尼詩道，而且只有一條路線，唔會好似其他地圖App咁有幾條路線可以揀。

路向四肢傷殘人士協會主席嚴楚碧都試用過個新功能，佢話覺得個App顯示埋𨋢位、樓梯等資料，對輪椅人士好有用，但有啲行人路中間有燈柱，唔夠闊畀輪椅過，希望運輸署可以加埋行人路闊度資料入去。羅慶新話幾個月內會推出無障礙步行路線，亦會加埋行人路闊度，方便輪椅人士。

運輸署今次用咗30萬做「易行」功能，明年中會加埋尖沙嘴步行路線，到明年底成個油尖旺區都可以用到，希望逐步推至全港，預計要用超過1000萬元；出年仲會將旗下3個App「乘車易」、「行車易」同「交通快訊」合併，等市民可以一次過睇晒啲交通資訊。