【明報專訊】恐襲氣氛瀰漫全球，唔少大型活動都成為攻擊目標，香港無恐襲，但防患未然，「賽馬會災難防護應變教研中心」製作動畫短片，盼提高市民嘅防範意識，教大家參與大型活動時點樣玩得開心又放心，包括去演唱會時留意緊急出入口位置、「山頂位」比握手位更易逃生等。

動畫主角除咗大家熟悉嘅西遊記人物外，仲有一班好得意嘅食物，好似洋葱圈、厚多士咁。短片長兩分幾鐘，透過唔同角色嘅表現，提大家早啲去演唱會現場做安檢，入場後唔好掛住打卡，應該睇清楚緊急出入口位置，仲話「握手位要行樓梯，山頂保命仔」，大家第日買演唱會時可以諗吓。

中心總監林楚釗話，香港無發生恐襲，但維持中度風險，而恐襲無處不在，港人難置身事外，所以製作動畫短片，加強個人同活動主辦單位嘅應變能力，並且已經同亞洲國際博覽館傾過，有望出年1月起，喺演唱會之前播放動畫，提醒大家參與大型活動時居安思危。