【明報專訊】前特首梁振英(CY)卸任無耐，就出任「一帶一路國際合作香港中心有限公司」同「大灣區香港中心有限公司」嘅董事，其中有關一帶一路嘅公司已有新搞作，最近就同李文俊慈善基金一齊推出計劃，希望青年可以喺一帶一路搵到新跑道。

一帶一路嘅中心噚日發出新聞稿，公布日前同李文俊慈善基金簽署協議，啟動「香港青年新跑道計劃」，為本港中學或大專學生，提供免費到「一帶一路」沿線發展中國家考察探索嘅機會。根據新聞稿，原來CY已擔任該中心嘅董事會主席，其他董事包括高靜芝、鄧爾邦、劉炳章、薛建平、張志剛及劉鳴煒。

參加嘅學生有機會去部分東盟國家、印度、巴基斯坦、孟加拉、中東及非洲各國探索體驗，計劃目前已批出10間學校嘅申請，各探索團下個月起陸續啟程。李文俊慈善基金為今次計劃捐出1000萬元，全數贊助學生參與「香港青年新跑道計劃」，預計受惠學生約1000名。

CY透過新聞稿話，今次遊學計劃重點係考察華商嘅經營、工作同生活情况，參加嘅學生學業上未必太突出，但肯闖敢拼，可能喺另一個環境會搵到新同更好嘅機會發展，話青年可走出一條新跑道。