防車長遇襲 九巴司機位研加膠板
[2017.10.27] 發表
【明報專訊】近期巴士車長經常遭到無理乘客襲擊,例如8月底有男乘客以為巴士「飛站」,一上車就拳毆女車長;9月底有男乘客懷疑瞌眼瞓唔記得落車,要求中途落車被拒絕後亦怒打車長。噚日有巴士迷就上載咗一幅圖片,顯示一架喺車廠內嘅九巴,車長位置加裝咗一塊透明膠板,以防車長再被乘客襲擊。
Emily向九巴朋友了解,就話原來九巴管理層對於接二連三嘅車長遇襲事件好憤怒,所以就要求研究可唔可以喺巴士加裝設施保護車長,最後覺得可以仿效英國巴士,喺車長位置隔籬加裝膠板,但仲需要研究究竟喺全密封定半密封、膠板物料,以及膠板會唔會反光影響到車長行車安全等,所以目前為止都仲係測試階段,仲未有已經安裝膠板嘅巴士喺馬路上行駛。
九巴發言人話,好關心員工安全,鑑於發生多次車長遭到暴力對待,正積極研究保障車長安全嘅方案,包括喺駕駛室旁安裝保護裝置,目前正改善設計同測試。
更多港聞
【明報專訊】政府下月16日舉辦《基本法》研討會,邀請全國人大常委會基本法委員會主任李飛主講,教育局日前向辦學團體發通告,邀請其轄下中學的學生...
詳情
相關新聞