解畫組班難 林太﹕目標人物驚駕馭唔到公務員

林鄭月娥（後排中）噚日下午仲同基本法委員會副主任梁愛詩（右三）、蘭桂坊主席盛智文（右一）等政商界重量級人物，齊齊出席民主思路召集人湯家驊（右二）成立嘅政治領袖文憑課程開學禮，同一眾學員興高采烈大合照。（李紹昌攝）

【明報專訊】民主思路今年同港大專業進修學院合辦政治領袖文憑課程，佢哋噚日舉行開學禮，請特首林鄭月娥到場致辭。林太講笑話，自己係以受惠者身分出席，因為自己都希望有更多成熟同有承擔嘅人才加入政府。佢形容現屆政府組班困難，原因係被接觸嘅人都話無行政經驗，未必駕馭到公務員，令佢感覺到如果缺乏公共行政基礎，會窒礙佢哋投身政治。

林太提到，改組後嘅中策組會聘任20至30個青年，佢話「相信讀完呢個課程嘅人係比較有優勢」，可以去投考。不過佢強調，唔係應承大家讀完課程就可以入政府工作，又形容𠵱家政治領袖嘅質素要求好高，除咗理論基礎，亦要有實踐，更要身體健康，因為特首呢份工「好難做」，自己近排病得好犀利，食咗好多抗生素先處理到。

課程大約有30個學員入讀，主要嚟自商界同專業界別，亦有公務員報讀，民建聯區議員林琳亦係學員之一。身兼民主思路召集人嘅行會成員湯家驊話，唔係希望學員畢業後一定要從政，但希望佢哋讀完之後返到自己工作崗位，能令社會對政治有深入同理性嘅認知，推動優質民主。

更多港聞

張雲正下月拉埋天窗

【明報專訊】年尾係結婚旺季，Emily聽聞，55歲嘅公務員事務局前局長張雲正將會同「80後」新聞主任呂卓穎（Florence）拉埋天窗，下個... 詳情

接替王桂壎 律師會彭韻僖掌報評會

【明報專訊】香港報業評議會噚日下午召開特別會員大會，議決接受王桂壎律師辭任主席，選出香港律師會副會長彭韻僖（Melissa）做新主席。 ... 詳情