【明報專訊】專欄作家屈穎妍日前出席公開集會時，以年前鉛水事件比喻，話佔中發起人戴耀廷恍如大學嘅鉛水喉管，將鉛水貫入學生腦內，一定要拆除；另一佔中發起人陳健民(KM)就反駁話，又唔見自己昔日嘅學生、工聯會鄧家彪去佔領，話鄧都算飲過「鉛水」。鄧家彪噚日喺facebook隔空回應老師，指KM「錯信姓戴嘅政治野心家，走錯路」。 自稱民生派 無深入了解民主 鄧家彪喺中大讀書時跟過KM寫畢業論文，阿彪話論文題目係 「探討香港露宿者情况」，邀請KM做論文導師。阿彪形容KM當年年輕友善，喺校園「稍受歡迎」，又話KM熟悉中國，對香港基層唔離地，但就錯信戴耀廷，「用犧牲法治嘅方式爭取抽空嘅民主政制，以攤牌搏鬥嘅方式與中央政府博弈。我當年探討窮人瞓街，誰料到十幾年後，你策劃瞓街」。 阿彪回想當年「無沾上鉛水」，係因為自己算係民生派，民生優先，無興趣跟隨KM深入了解民主化理論，但都衷心感謝KM嘅教導。 另外，戴耀廷同KM等「佔中9子」今日下午要就佔中案上庭。KM話收到兩封唔同嘅「問候信」：一封係粗口「問候信」，另一封係感謝KM為香港社會付出，KM話信件反映人嘅品質高下立見。民主派就呼籲支持者今日去法庭外聲援「佔中9人」。
|
| |
| |
;){kind=small}
;)
