被質疑親商「摸不着頭腦」 羅致光﹕勞工政策應稍偏向基層
[2017.07.31] 發表
【明報專訊】學者出身嘅勞工及福利局長羅致光(CK)，早前被專欄作家指佢公開話「香港的勞工政策事務過於偏重勞工」，CK噚日喺網誌解畫，指呢個評論令佢「丈八金剛摸不着頭腦」。CK話點解佢喺唔同場合表達勞工政策「應該稍為偏向基層勞工」嘅見解，會反過來變成「過於偏重勞工」？
話要同時平衡中小微企業
CK話，大家諗吓點解有啲人喺中環食商務午餐嘅價錢，已經等於基層一星期嘅食物開支，少數高薪人士一年收入，已遠遠超過70歲清潔工人嘅終身收入，大家就會明白點解佢對住商界時，都表明香港勞工政策應向基層勞工傾斜。
撐完勞工，CK亦強調平衡勞資雙方利益，佢話香港中小微企業佔企業九成以上，絕大部分呢類企業，如飲食業、零售業都係處於高度競爭嘅市場，其他企業都面對全球一體化下要激烈競爭，所以考慮點改善勞工權益時，亦必須考慮僱主承受力。
茶記老闆大集團唔係同一類
CK話，可能就係咁令部分人認為佢「親商」，但佢覺得呢個諗法係受制於二元思維，將僱員僱主對立。佢指出唔少中小微企僱主，無論用收入定生活指數計算，都同一般勞工無異，分別可能只係資產差異，所以諗勞工政策時，唔可以將茶餐廳老闆同大集團睇成同一類商界或僱主。
更多港聞
相關新聞
