好爸唔易做 民建聯倡增男士支援服務

【明報專訊】聽日就係父親節，爸爸平日要返工又要照顧仔女，認真唔簡單。有調查顯示，超過五成受訪爸爸每日陪老婆仔女嘅時間唔夠一粒鐘，原因主要係工作太忙，最經常畀太太投訴嘅都係太少時間陪伴家庭，情况令人憂慮同關注。

訪問咗205個男士，最多受訪男士想太太同自己講：「你辛唔辛苦呀？」反映佢哋忙咗成日，最想都係心愛嘅人一句體恤同問候。民建聯婦女事務委員會提醒各位太太，應該同丈夫多啲溝通分享，多關心體諒，多包容讚賞，令家庭更融洽和諧。佢哋又建議政府應該增加男士支援服務，推動家庭友善政策同埋家庭友善嘅工作環境，等員工有更多家庭生活時間。

另外，綠色和平翻查咗舊年5個節日前後兩星期，facebook嘅商品促銷帖文廣告有超過3萬則，佔整體與節日有關帖文19%至37%不等；調查更發現促銷帖文成功搶佔節日期間互動率最高帖文超過一半，父親節時更加高達65%，認為商人透過軟性促銷手法鼓吹送禮，潛移默化影響香港人，呼籲香港人反思，重拾節日真正意義。