【明報專訊】今年喺六七暴動50周年，呢件事喺政治上好敏感，有當年被捕坐監嘅少年犯近期提出希望有關當局可以重新評價呢場暴動，而特首梁振英(CY)噚日被問到政府會唔會為六七做啲事，CY簡單直接回應﹕「我們向前看。謝謝。」 CY噚日出席行政會議前見記者，回應六七暴動就唔多講，但就主動講本周率團上京參加「一帶一路」高峰論壇。CY被問到今次北上點解唔請埋候任特首林鄭月娥，佢就話﹕「我們很早的時間已經要向中央交名單，由中央決定。」 CY講到一帶一路就滔滔不絕，話對「一帶一路」非常有信心，對香港人喺外邊打開各種市場有信心。佢答咗幾條問題，已經講咗11次「一帶一路」。佢又話5月14日喺北京嘅論壇，係國家重要嘅外交場合，又話自己「很破格」獲安排一場發言嘅機會，中央亦「破格」畀香港組成30人嘅代表團參加。 Emily都好想知道，CY到時會點樣向各國代表推銷一帶一路同香港，唔知佢到時嘅發言，提一帶一路嘅次數，會唔會超過2016年施政報告40幾次嘅紀錄？
|
| |
| |
;)
