【明報專訊】立法會議員田北辰(左四)之前拖住6個區議員一併退出新民黨後，日前終於成立咗一個新組織，叫「實政圓桌」，由佢做召集人。呢個名都有啲講法，二少拆字介紹，「實政」代表佢向來「做實事，唔玩政治」嘅理念，「圓桌」嘅意義就係人人平等，事無大小都齊齊坐埋傾，絕對唔會「一言堂」。

講到明無「一言堂」，田二少噚日帶團隊見完候任特首林鄭月娥後就身體力行，埋咪兜見記者時，畀足機會成員，人人有份講。二少更語帶雙關話「其他政黨同組織一定做唔到」。

「實政圓桌」啱啱成立，已好有心思設計咗新標誌，Emily見到，一張圓枱有七張櫈，代表佢哋每個人，用色就係淺藍漸變淺黃，反映佢哋務實嘅政治立場。