【明報專訊】海關一向會訓練狗狗做毒品搜查工作。近日Emily收到消息,一隻1歲大、海關訓練咗8個月嘅混唐狗Lab,因未能通過評核,需要退番畀漁護署,故有市民公開呼籲,希望快啲有好心人領養Lab,擔心佢一個月內無人領養會被人道毁滅。
Emily聽講,海關不時會到漁護署挑選合適嘅狗,嘗試訓練成為搜查犬,過去3年都未試過有退番畀漁護署嘅情况,今次情况特別,相信被揀得嘅狗狗健康唔差。海關就話,不時接收由漁護署轉介嘅被遺棄犬隻,嘗試訓練成為毒品搜查犬;若訓練後仲未通過評核測試,就會交番畀漁護署,安排市民領養。至於會唔會安排海關內部領養,海關就無特別回覆。
漁護署就話已收到海關轉介該唐狗,目前未被領養,又話接收嘅動物如果健康良好,由獸醫評估屬性情溫和同適合領養,都會安排送交動物福利團體,由佢哋安排畀市民領養。