【明報專訊】立法會財委會噚日討論下屆高官加薪嘅建議，民主派議員預先表明會「拉布」反對。負責解畫嘅政制及內地事務局長譚志源喺開會前，就買咗4盒西餅慰勞一眾議員，強調自己係「真誠希望」請大家食嘢。不過，專業議政莫乃光就喺會上話「唔敢食」，事關局長做法好似有利益衝突，仲問局長有無徵詢過廉署意見喎。 食餅陳克勤：蛋糕難打牙骱 Emily噚日見到幾盒西餅除咗有朱古力、綠茶等唔同口味，每盒盒面仲貼有「政制及內地事務局局長致送」嘅字條，有份食西餅嘅民建聯陳克勤話「蛋糕就難打人牙骱軟」；熱血公民鄭松泰望一望盒西餅就話，以局長月薪30幾萬嚟講，幾盒西餅都算「幾平實」。 莫乃光喺財委會發言時，就話自己唔敢食啲西餅，事關今次財委會講緊高官加薪，雖然唔知局長下屆仲會唔會連任，但都可能造成利益衝突，仲問局長點解要請議員食餅？譚志源聽到條問題就笑晒口，話呢種款待唔違反防貪指引，強調自己係「出心」，但認為大家毋須勉強，議員會婉拒都係能夠理解嘅。
|
| |
| |
;){kind=small}
;)
