【明報專訊】Emily早排報道過荃灣沙嘴道生記士多店主患末期癌症，為籌集醫藥費減價促銷，網民亦喺facebook呼籲幫手散貨。Emily噚日再去生記士多，店主個仔方先生話多得網民同街坊幫手，加上有酒廠肯平價回收貨品，目前舖頭已經清走一半貨。而舖頭早排亦有一班退休朋友表明願意頂租，仲會買埋存貨同電器等。

方先生話爸爸月初出院後，媽媽要留喺屋企照顧佢，又要帶佢出入醫院覆診。而方先生仲讀緊大學，無法兼顧士多，所以希望本月初可以提早解約，不過舖頭業主一直無講明係咪同意同可否取回按金。方先生話租約原定明年4月到期，按照合約，若佢哋提早解約，業主的確有權扣起按金，「雖然(按金)3萬幾話多唔多，但對我哋都有幫助」，但佢認為既然有新租戶願意頂手，業主喺租金收入上無損失，所以希望業主都可以考慮吓佢爸爸患病情况，酌情處理，退番啲按金。