【明報專訊】為追上網絡時代，今屆立法會選舉民建聯動用唔少新媒體大打宣傳戰，Emily從最新公布嘅九龍東柯創盛選舉開支睇到，民建聯喺選舉期間花咗唔少錢喺網上平台，包括用2萬蚊賣YouTube廣告、10萬蚊喺Yahoo! News賣廣告。佢哋仲設立咗民建聯選舉網站，設計費近6萬蚊。不過喺幾個候選人分擔之下，都唔算好大負擔。 選舉網設計費6萬 柯創盛都有逐一申報自己透過facebook、WeChat向選民發放信息，仲委託九龍東潮人聯會代為發出電話錄音廣播。不過民建聯主打各階層選民，傳統媒體當然都有覆蓋，例如用咗10萬蚊喺免費報紙刊登中間雙頁廣告；最特別嘅，就係用咗6000元喺一份喺本地嘅巴基斯坦報紙賣廣告，果然夠多元化。 柯創盛名單花138萬 民建聯最強大嘅都係「地面戰」，的士、小巴、港鐵車身廣告一樣唔少。喺7月中至9月初期間，該黨喺48架巴士刊登大型車身廣告，總共需要30萬左右；200架的士廣告就花費18萬蚊。佢哋仲用咗約62萬喺港鐵賣廣告，覆蓋所有線路。 柯創盛名單選舉期間總共用咗138萬，全由民建聯贊助。相比之下，政治素人黃琛喻參選新界東就顯得資源有限，只花咗4.3萬，但有4萬蚊來自不同人嘅捐助。
|
| |
| |
;)
