【明報專訊】中秋節令一眾打工仔都有長假期，政務司長林鄭月娥亦喺星期四下晝開始小休幾日，下星期一先返工。《星島日報》噚日就報道，林鄭今次放假係低調去北京，但未知同特首選舉係咪有關，而報道引述有官場中人估計，唔排除林鄭係去北京探個仔。林鄭個大仔林節思今年加盟內地手機公司小米做營運經理，做軟件開發。 有政界人士同Emily講，星期初與林鄭傾開，問過林鄭幾時得閒食飯傾吓偈，林鄭就話自己會放幾日假，但當時佢無透露會去邊。雖然林鄭過去都暗示自己無意參選特首，但政圈中人似乎唔多相信，所以林鄭低調上北京，的確會令人有揣測。 至於財政司長曾俊華7月時曾經講起參選特首問題，話「如果對香港有貢獻，我願意做」，雖然一直未有高調舉動，但《E周刊》就報道，財爺上星期四原來同多名政商界人士飯局，好似遠東發展主席邱達昌、嘉華集團及銀河娛樂副主席呂耀東、經民聯立法會議員林健鋒同石禮謙、青協總幹事王䓪鳴，警務處長盧偉聰嘅座駕亦喺現場。據知呢次飯局喺立法會選舉前已經約好，唔知呢班政、商界人士聚首，會唔會討論吓時政呢？
|
| |
| |
;)
