無綫冇報棄選新聞 通訊局接44投訴
【明報專訊】立法會選舉完結,多名泛民候選人喺上周五宣布棄選,無綫新聞並無報道相關消息,令唔少網民不滿,通訊局話截至噚日(5日)共收到44宗投訴,主要投訴無綫選擇性報道新聞、自我審查、隱瞞事實等。
翻查資料,無綫當日嘅《六點半新聞報道》同《晚間新聞》時段都用咗較主要篇幅報道新加坡寨卡疫情,但無提及過候選人棄選嘅消息,其他新聞時段亦唔見有提。由於其他傳媒都大篇幅報道,所以無綫嘅處理手法引起網民非議。
通訊辦發言人話,通訊局截至昨午5時收到44宗有關無綫喺9月2日新聞無提候選人棄選,主要投訴內容為無綫選擇性報道新聞、自我審查、隱瞞事實、剝奪市民知情權、延誤選民掌握選情,對選民投票權利影響極大等。本報昨致電無綫新聞部總監袁志偉,至截稿前未有回覆。
無綫企業傳訊部助理總經理譚錫揚就話,現時法例無棄選或退選機制,所有候選人有權選擇點樣拉票或宣傳,或者唔拉票、唔宣傳,選民亦有投票嘅自由,無綫新聞部有編輯自主,會按專業處理每一宗新聞。