【明報專訊】立法會噚日繼續審議《2016年醫生註冊(修訂)條例草案》，被稱為「怪醫」嘅醫學界立法會議員梁家騮，全日點人數逾20次，搞到唔少議員走上又走落。連民主黨主席劉慧卿都頂唔順瘋狂點人數嘅行徑，公開呼籲怪醫盡快停止拉布。卿姐話，從政25年都無哀求過人，今次係首次，希望佢「放過議員、放過香港」。
怪醫做咗兩屆議員，合共8年都神龍見首不見尾，唔少議員私下笑言，今次怪醫拉布、出席會議嘅時間係過去4年嘅總和。有泛民議員話曾勸怪醫點少幾次，但怪醫太有性格，只係笑一笑，就繼續點人數。
副局政助都要做「狗仔」
為咗防止流會，食衛局除咗派幾十個「狗仔隊」監察議員出入，連副局長陳肇始、政治助理陳凱欣都要加入「狗仔隊」行列，戴耳機同對講機，互相通報議員出入情况，以及點人數時拉議員開會；加上噚日立法會有多樣嘢發生，記者數目大增，立法會可謂人山人海。
;)
