【明報專訊】上水鄉事委員會主席侯志強(侯強)組黨未成，但不愁寂寞，鍾意講嘢嘅佢去網台D100做埋客串主持，每周開咪一次。節目名叫《西城故事》，由主持人沈西城同嘉賓主持侯強合作，主題係講新界風俗。

侯強擔任河上鄉村長接近20年，佢話河上鄉於農曆二月十三日期間舉行洪聖爺誕，邀請萬多人參與，有搶花炮、睇粵劇、食盆菜。長洲有平安包，上水就有平安錢，可以許願保平安，仲話現正申請為國家級非物質文化遺產。該活動經費約200萬元。

仔女勸做人唔好太寸

侯強成日牙擦擦，又話自己事事講道理，話有理打遍天下無敵手，無理就寸步難行。佢仲聲稱自己每日飲一杯蒜頭汁，咁會唔會大口氣呢，佢就話由旁人評論！不過，佢嘅仔女已長大，但就唔太認同老竇嘅說話，仲勸告侯強做人唔好太寸。呢個節目今晚(周三)7點播出，每周播出一次。