【明報專訊】近來「巴拿馬文件」令人關注離岸公司被政商界等人使用以避交易曝光嘅情况，廉政專員白韞六噚日喺天津出席國際反貪局聯合會(聯合會)嘅大會時作專題演講，都有講起離岸公司。白sir講起，現今唔少國家領袖、跨國企業高層人員及國際組織官員，都先後捲入貪腐案件，而新曝光嘅資料顯示，離岸公司被人用以隱瞞收益人嘅身分，以及被用作逃稅及清洗貪污所得收益及資產。

白韞六話，各地已響起警號，貪污賄賂損害政治制度，引起社會動盪。白sir講起，反貪機構未來都要就全球一體化及資訊科技發展所帶來轉變作靈活變通，並要改革創新，佢提到要加強合作，尤其司法管轄區之間嘅合作，令到貪污分子走到天涯海角都走唔甩，要做到追番贓款。佢仲提到根據《聯合國反腐敗公約》及刑事事宜相互法律協助嘅雙邊協定，廉署於過去3年接獲19個國家31項有關要求，並向9個國家提出14項相關要求。