【明報專訊】因對抗SARS而令大家熟悉嘅中大校長沈祖堯，眨下眼做咗校長就嚟6年，沈校長之前向學生、校友同教職員發信，話早喺2014年已向校董會表明，想快啲返醫學院教書同做研究，所以當時續任一個短啲嘅年期，去到2018年6月30號，如果校董會早啲選出新校長，佢亦願意提早交棒，但對參政絕不感興趣。Emily噚日喺「中大創業日」見到沈校長，當然問吓佢卸任之後有咩打算，佢話自己係醫生，好鍾意醫院嘅醫療工作，睇住過去6年醫學界唔少新發展，尤其癌症方面，自己想趁仲有能力、記性、創意嘅時候返去做研究同睇症。

Emily問佢點解咁強調唔加入政府呀？沈校長就話唔係話自己唔入政府，但唔會從政，在場有記者即刻追問係咪為自己「留尾巴」，可能會考慮入政府做醫療相關嘅官職，沈校長笑住叫大家唔好想像得佢嘅說話太遠，佢希望直接做臨牀嘅睇病工作，同返去醫療研究團隊，「擺低咗醫療工作6、7年，我仲有好多病人，但只得逢星期六上晝(睇症)」。咁又係咪外界傳聞佢頂唔順社會同校園壓力而提早交棒呢？沈校長就話壓力人人都有，「學生都有壓力啦」。