【明報專訊】繼工聯會立法會議員郭偉強榮升老竇後，民建聯議員陳恒鑌(Ben)早前亦添丁，加埋6歲女兒湊成一個好字。噚日Ben喺立法會向一眾議員同傳媒大派薑醋，初生BB似乎搞到阿Ben幾辛苦，佢話阿仔出世近一個月，佢已經瘦咗5磅，對眼仲細咗，皆因夜晚要餵奶、換片等，無覺好瞓。

阿仔頻頻請「飲茶」

阿Ben話大女出世時大部分時間都係食同瞓，所以當時唔算湊得好辛苦，但現時細仔不時要換片，仲幾乎隔日幫阿仔換片時，阿仔就請佢「飲茶」，搞到佢一身濕晒。

雖然已經湊成一個好字，但經民聯議員林健鋒就鼓勵阿Ben繼續努力，叫佢生夠一隊足球隊，即係11個小朋友喎，阿Ben聽到呢句說話反應甚大，直言「一個老婆點生一隊足球隊呀？」