【明報專訊】上水鄉事委員會主席侯志強及十八鄉鄉事委員會主席梁福元大張旗鼓籌組「新進步聯盟」多時，如今好事將近，敲定下禮拜一喺荃灣如心酒店大擺宴席，搞成立典禮。佢哋近日廣派請帖，邀請各界到場，包括中聯辦同埋特區政府官員。 林偉強：保持獨立之身唔出席 雖然未有官員覆實會賞面出席，不過Emily聽聞，唔少鄉事「自己人」都選擇避席，以免被誤會支持組黨。早前表態熱切期待組黨、曾傳出擔任該黨榮譽主席嘅鄉議局主席劉業強(圖)噚日亦「褪軚」，話未收到邀請信。大家梗係追問，如果收到會唔會出席？佢就耍太極話「收到先算，無得諗」。不過劉業強表明，唔會做政黨榮譽主席，仲謙虛咁講自己喺鄉議局仲有好多嘢做，分身不暇。 無收到邀請信嘅仲有鄉議局副主席林偉強，不過佢就預告唔會出席，話以往政黨成立邀請佢，為咗保持「獨立之身」都好少去，所以今次都唔會因為「自己人」而破例喎。其實Emily聽聞，大部分鄉頭透過WhatsApp收到邀請信，不過唔出席嘅理由就五花八門，好似荃灣鄉事委員會主席鍾偉平就話嗰日有會要開，所以唔得閒。想知到底個日有咩重量級嘉賓出席，就要拭目以待嘞。
|
| |
| |
;){kind=small}
;)
